Türkmenistanyň Söwda we daşary ykdysady aragatnaşyklar ministrliginiň işi

Türkmenistanyň Söwda we daşary ykdysady aragatnaşyklar ministrligi söwda, daşary ykdysady aragatnaşyklar we sarp ediş kооperasiýasy babatda döwlet syýasatyny amala aşyrýar. Öz işinde Türkmenistanyň Konstitusiýasyna, Türkmenistanyň kanunlaryna we Türkmenistanyň Prezidentiniň beýleki kadalaşdyryjy namalaryna, Türkmenistanyň Ministrler Kabinetiniň çözgütlerine, Türkmenistanyň Mejlisiniň kararlaryna we beýleki kadalaşdyryjy hukuk namalaryna esaslanýar.

Türkmenistanyň Söwda we daşary ykdysady aragatnaşyklar ministrliginiň esasy wezipeleri — bazary harytlar, önümler we hyzmatlar bilen üpjün etmek, söwda hyzmatynyň we jemgyýetçilik iýmitiniň guralyşyny kämilleşdirmek, lomaý-bölek satuw söwdasyny guramak we ösdürmek, senagat-tehniki maksatly harytlary, önümleri we çig maly satyn almak, halkara şertnamalaryna laýyklykda daşary bazarda döwlet bähbitleriniň berjaý edilmegini üpjün etmekdir.

Türkmenistanyň Söwda we daşary ykdysady aragatnaşyklar ministrligi:

• Türkmenistanyň söwda we daşary ykdysady aragatnaşyklar babatdaky döwlet syýasaty boýunça teklipleri işläp taýýarlaýar we durmuşa geçirýär;
• Bazary önümler, harytlar we hyzmatlar bilen üpjün edýär, söwda hyzmatynyň guralyşyny kämilleşdirýär, öňdebaryjy ýerli we daşary ýurt tejribesini, öňdebaryjy tehnologiýalary ýaýbaňlandyrýar;
• Sarp ediş bazaryny hil taýdan pes harytlardan goramak boýunça işleri guraýar we degişli kadalaşdyryjy namalary taýýarlaýar;
• Söwdada, jemgyýetçilik iýmitinde we sarp ediş kооperasiýasynda ykdysady özgertmeleri çuňlaşdyrmak, monopoliýadan çykarmak we bäsdeşlik gurşawyny döretmek, döwlet söwda we jemgyýetçilik iýmiti kärhanalaryny hususylaşdyrmak, söwdany ösdürmek boýunça maksatnamalary işläp taýýarlamaga we durmuşa geçirmäge gatnaşýar;
• Bazar gatnaşyklaryny we telekeçiligi höweslendirmek, bahalary emele getirmek ulgamyny, salgyt salmagy we hasabatlylygy kämilleşdirmek boýunça teklipleri taýýarlaýar;
• Azyk we azyk däl harytlaryň hem-de senagat-tehniki maksatly önümleriň zerur bolan strategiki gorlaryny döredýär;
• Türkmenistanyň daşary ykdysady aragatnaşyklar babatdaky halkara şertnamalaryndan we ylalaşyklaryndan gelip çykýan borçnamalar hem goşmak bilen, daşary bazarda döwlet bähbitleriniň berjaý edilmegini üpjün edýär.

Kiçi we orta telekeçilik bilen hyzmatdaşlyk

Türkmenistanyň Söwda we daşary ykdysady aragatnaşyklar ministrliginiň kärhanalary kiçi we orta telekeçiligiň wekilleri bilen hem ýakyndan hyzmatdaşlyk edýärler:

• ilat üçin elýeterli bahalardan azyk harytlary satyn alynýar;
• dürli desgalaryň gurluşygy üçin niýetlenen senagat-tehniki maksatly önümler getirilýär;
• öndürilýän önümler üçin çig mal getirilýär;
• azyk harytlaryny öndürýän desgalaryň (çörek-bulka, süýt we et önümlerini öndürýän kärhanalaryň) gurluşygy amala aşyrylýar.